تعلم البرمجة بالدارجة المغربية

كيفاش جوج ديال الناس كيخبيو رسالة؟ التشفير والـ AES بالدارجة

كيفاش جوج ديال الناس كيخبيو رسالة؟ التشفير والـ AES بالدارجة

شوف هاد الكلام:

U2FsdGVkX18sRcIyy08zMFULqgais1zIj6gvjHVnpJcMIT4yaZovSfhzMCmgBhxQ

هادي رسالة قصيرة بالدارجة. واش تقدر تقراها؟ حتى أنا، بلا الساروت ديالها، ما نقدرش. ولكن كاين جوج ديال الناس اللي كيقراوها فثانية. شكون هوما… وكيفاش؟

هادا هو المقال ديال الحلقة 2 من سلسلة “الأمن الرقمي من الألف للياء” (الفيديو كامل فـ القناة ديالنا فاليوتيوب). غادي تفهم كيفاش كيتسد الكلام بساروت واحد، وعلاش ما كيتحلش بلا بيه، وفين كاين المشكل الكبير. ومن بعد، فـ «جرب معايا»: غادي تسد دوسي بـ password فالماك ولا فالـ Windows، وتشوف واش الديسك ديالك مشفر.

الأمثلة فهاد المقال حقيقية: خرجو من الماك (macOS 26.5) نهار 14 نونبر 2026، برسالة ديال التجربة، دوسي ديال التجربة، وpassword ديال التجربة salam123. حتى سر حقيقي ما دخل هنا.

صندوق الزليج

تخيل صندوق صغير ديال الزليج، فيه قفل واحد. والقفل عندو ساروت واحد.

كتصاوب من الساروت نسخة، وكتعطيها لولد عمك. دابا عندكم بجوج نفس الساروت. كتحط الرسالة لداخل، كتسد، وكتصيفط الصندوق. واللي شدو فالطريق، يقلب فيه كيف بغا… ما يقدرش يحلو. ولد عمك كيحلو بالنسخة ديالو، وكيقرا.

السميات

  • الرسالة اللي كتقرا عادي، سميتها plaintext.
  • الصندوق المسدود، يعني الكلام اللي ولا خربشة، سميتو ciphertext.
  • الساروت هو الـ key.
  • ملي كتسد، سميتها encryption، يعني التشفير. وملي كتحل، decryption.

وحيت نفس الـ key هو اللي كيسد وهو اللي كيحل، كيسميوها symmetric encryption. الـ NIST، يعني National Institute of Standards and Technology، كتشرح السمية هكا: «symmetric» حيت نفس الـ key كيدير العملية والعكس ديالها.

الفرق مع الـ hash

فـالحلقة اللولة شفنا الـ hash، بحال طابع الصبع: كتاخدو من الكلام، ولكن ما كترجعش منو للكلام. التشفير لا. الكلام كيرجع كيف ما كان، حرف بحرف… ولكن غير للي عندو الـ key.

الـ hash التشفير
واش كيرجع للأصل؟ لا، عمرو إيه، بالـ key
واش فيه key؟ لا إيه، والـ key هو كلشي
فين كيتستعمل؟ الـ passwords، التأكد من الملفات الرسائل، الملفات، الديسك

مثال 1: لعبة صغيرة

خود الكلمة salam، وكل حرف، زيدو 3 ديال الحروف للقدام:

s → v
a → d
l → o
a → d
m → p

salam → vdodp

الـ key هنا هو الرقم 3. واللي عارفو، كيرجع كل حرف 3 للور، وكيلقى salam.

كل حرف +3: salam كتولي vdodp، والـ key هو 3

علاش هاد اللعبة كتطيح بزربة؟

حيت كاينين غير 25 ديال المفاتيح. جرب كل واحد، وشوف شنو كيخرج من vdodp:

1   ucnco   والو
2   tbmbn   والو
3   salam   لقيتيها!
4   rzkzl   والو
…
25  wepeq   والو

غير الـ key 3 اللي كيعطي كلمة. هادشي سميتو brute force: تجرب كاع المفاتيح وحدة بوحدة. و25 محاولة، كيديرها أي واحد بيديه.

التشفير ديال بصح: AES

التشفير ديال بصح خاصو جوج حوايج: طريقة قوية، وبزاف بزاف ديال المفاتيح.

الطريقة اللي غادي تلقاها اليوم فالماك وفالـ Windows سميتها AES، يعني Advanced Encryption Standard. ختاراتها NIST فعام 2000، وخرجات standard فعام 2001 (FIPS 197).

وعوض ما تزيد 3 للحروف، كتخلط الرسالة بلوك ببلوك، 128 bit فكل بلوك، مع الـ key، دورة من مور دورة.

شحال من key كاين؟

الـ key ديال AES كيكون 128، 192، ولا 256 bit. كل bit يا 0 يا 1. وكل bit زايد، كيضرب عدد المفاتيح فـ 2.

بـ 256 bit، عدد المفاتيح هو 2 أس 256. حسبتو بـ python:

2**256 = 115792089237316195423570985008687907853269984665640564039457584007913129639936

رقم طويل فيه 78 ديال الأرقام، يعني تقريبا 1.16 × 10 أس 77. اللعبة ديالنا كان فيها 25. هادي فيها تقريبا 1، ومورو 77 ديال الأصفار.

NIST كتعطي لـ AES-256 قوة ديال 256 bit (security strength). يعني باش تكسرو بالتجريب، خاصك تقريبا 2 أس 256 ديال العمليات.

إيوا فين كاين الضعف؟

التجريب ماشي هو الطريق. NIST راه كتقول: أسهل تسرق الـ key، على ما تجرب كاع المفاتيح. ولا تخمن الـ password الضعيف اللي كيتصاوب منو الـ key. عقل على هادي، غادي نرجعو ليها.

مثال 2: نشوفوها بعينينا فالـ Terminal

هادشي مزيان فالكلام… ولكن واش بصح الرسالة المشفرة ما كيبان فيها والو؟ يالاه نشوفو.

كتبت رسالة صغيرة فملف:

printf 'salam, nlt9aw f9ahwa 7' > msg.txt

ومن بعد شفرتها بـ AES-256، مع password ديال التجربة salam123:

openssl enc -aes-256-cbc -pbkdf2 -a -in msg.txt -out msg.b64 -pass pass:salam123

شنو كيعني كل جزء:

  • -aes-256-cbc: الـ AES بـ key ديال 256 bit. وcbc هي الطريقة باش كيتسلسلو البلوكات، يعني Cipher Block Chaining.
  • -pbkdf2: كتحول الـ password لـ key ديال 256 bit. يعني Password-Based Key Derivation Function، النسخة 2. وكتعاود الحساب 10000 مرة باش كل تخمين يغلى.
  • -a: كتكتب النتيجة بحروف كتنقرا (base64)، باش نقدرو نشوفوها.

وها شنو خرج:

cat msg.b64
U2FsdGVkX18sRcIyy08zMFULqgais1zIj6gvjHVnpJcMIT4yaZovSfhzMCmgBhxQ

خربشة. لا salam، لا 9ahwa، والو.

وزيد: عاودت نفس الأمر، بنفس الرسالة ونفس الـ password… وخرجات خربشة أخرى كاملة:

U2FsdGVkX1+dT+DNtk6ol5UGggXR9A/zCXlzhXhJgw+t3SFA4E7rrR0o/npkhN93

علاش؟ حيت كل مرة كيتزاد salt جديد، بحال اللي شفنا فالحلقة اللولة، وكيخرج key آخر. وداك U2FsdGVkX1 اللي فالبداية ديال الجوج؟ هو Salted__ مكتوب بالـ base64: العلامة اللي كتقول بلي الـ salt مخبي مورها.

نفس الرسالة، نفس الـ password، جوج خربشات مختالفين: الـ salt

دابا نحلو

نفس الأمر، زدت -d، وعطيتو salam123:

openssl enc -d -aes-256-cbc -pbkdf2 -a -in msg.b64 -pass pass:salam123
salam, nlt9aw f9ahwa 7

حرف بحرف. وبدلت حرف واحد فالـ password، salam124:

openssl enc -d -aes-256-cbc -pbkdf2 -a -in msg.b64 -pass pass:salam124
bad decrypt
error:1C800064:Provider routines:ossl_cipher_unpadblock:bad decrypt

ما بغاش. وداك الشوية اللي خرج معاه؟ غير خربشة. جربت 200 password غالط آخرين: 200 من 200 ما دازوش. ولكن رد بالك: الوثائق ديال openssl كتقول بلي هاد التحقق ضعيف، يعني مرة مرة الـ password الغالط كيعطيك خربشة بلا خطأ. فالحالتين، بلا الـ key الصحيح، ما كاين والو.

هاد الأوامر خدامين حتى بالـ openssl اللي جاي مع الماك (LibreSSL 3.3.6). جربتهم بجوج.

المشكل الكبير

ولكن عاود شوف مزيان. أنا وولد عمي خاصنا بجوج نفس الـ key. والرسالة كتمشي فالإنترنت…

كيفاش نعطيه الـ key بلا ما يشدو شي واحد فالطريق وينسخو؟ إلا صيفطتو فنفس الطريق، اللي شاد الطريق شاد كلشي. NIST كتقول بلي الـ keys اللي كتعطى باليد خاصهم يتحماو فالطريق كاملة.

كيفاش يوصل الـ key بلا ما ينسخو شي واحد فالطريق؟

هادا هو المشكل الكبير ديال الـ symmetric encryption. والحل ديالو ذكي بزاف… فالحلقة الجاية.

جرب معايا: سد دوسي بـ password

عندك شي دوسي فيه أوراق ديالك: صورة البطاقة، الكونطرا، الفاكتورات… غادي نسدوه بـ password.

فالماك: Disk Utility

ما محتاجش حتى برنامج. كاين Disk Utility، وهو ديجا عندك.

  1. حل Disk Utility (Cmd + Space، وكتب Disk Utility).
  2. مشي لـ File، ثم New Image، ثم Image from Folder.
  3. ختار الدوسي، وكليكي Open.
  4. فـ Encryption ختار 256 bit AES (recommended). رد بالك: كاين حتى 128 bit AES، ختار 256.
  5. كتب الـ password جوج مرات، وكليكي Save.

كيخرج ليك ملف واحد مسدود. Apple كتقولها بالواضح: إلا نسيتي هاد الـ password، ما غاديش تقدر تحل الملف ولا تشوف الملفات اللي فيه.

شنو جربت أنا

درت نفس الشي من الـ Terminal بـ hdiutil، على دوسي ديال التجربة Wra9i فيه جوج ملفات:

printf 'salam123' | hdiutil create -encryption AES-256 -stdinpass -srcfolder Wra9i -volname Wra9i -format UDZO Wra9i.dmg
hdiutil isencrypted Wra9i.dmg
created: …/Wra9i.dmg
encrypted: YES
passphrase-count: 1

بالـ password الصحيح، تحل الملف وبانو فيه الأوراق. وبـ salam124:

hdiutil: attach failed - Authentication error

وقلبت داخل الملف على الجملة اللي كاينة فالأوراق (grep 'test document' Wra9i.dmg): ما لقيت والو. الكلام ما كيتقراش من برا.

هاد الطريقة بـ printf غير للتجربة: الـ Terminal كيعقل على الأوامر. بالـ password الحقيقي ديالك، خدم بـ Disk Utility.

ولكن رد بالك: الدوسي الأصلي باقي فبلاصتو، بلا تشفير. حل الملف الجديد، تأكد بلي كلشي فيه، وعاد مسح الدوسي القديم.

فالـ Windows: 7-Zip

  1. تيليشارجي 7-Zip من الموقع ديالو: 7-zip.org.
  2. كليكي يمين على الدوسي، 7-Zip، ثم Add to archive….
  3. فـ Archive format ختار 7z.
  4. كتب الـ password فـ Enter password، وعاودو فـ Reenter password.
  5. الـ Encryption method غادي تلقاها AES-256 (فالـ 7z، هي الوحيدة).
  6. علم على Encrypt file names، باش حتى السميات ديال الملفات ما يبانوش.
  7. كليكي OK.

ما جربتش 7-Zip هنا: الخطوات من المساعدة الرسمية ديالو. وحتى هنا، الدوسي الأصلي كيبقى: مسحو من بعد ما تتأكد.

الصندوق الكبير: الديسك كامل

إلا تسرق ليك الـ laptop، الدوسي المسدود ما كافيش. خاص الديسك كامل يكون مشفر.

فالماك:

  1. System Settings ← Privacy & Security.
  2. هبط حتى لـ FileVault. خاصو يكون On.

وإلا بغيتي تشوف من الـ Terminal (كيقرا برك، ما كيبدل والو):

fdesetup status
FileVault is On.

فالـ Windows:

  1. Settings ← Privacy & security ← Device encryption. خاصو يكون On.
  2. وإلا كان عندك Windows Pro، كتب فـ Start: BitLocker، وحل Manage BitLocker، ومن بعد Turn on BitLocker.

والتليفون؟ الـ code ديال القفل هو الساروت.

  • فالـ iPhone: Settings ← Face ID & Passcode ← Turn Passcode On. ملي كتدير passcode، كيتشعل Data Protection بوحدو.
  • فالـ Android: التليفونات اللي خرجو بالأندرويد 10 ولا أكثر مشفرين، والملفات ديالك ما كتحلش حتى كتحل التليفون. Settings ← Security ← Screen lock. غير ما تخليهش بلا code.

الديسك كامل: FileVault، Device encryption، والتليفونات

جوج غلطات

اللولة: نسيتي الـ password ديال الملف؟ ما كاين حتى reset. حطو فشي password manager، ولا كتبو وخبيه فبلاصة آمنة. وحتى الـ recovery key ديال FileVault ولا BitLocker، خبيه مزيان: Apple كتقول بلي إلا نسيتي الـ password والـ recovery key بجوج، الملفات كيمشيو للأبد.

التانية: ما تصيفطش الـ password مع الملف، فنفس الإيميل ولا نفس الشات. الملف فالإيميل، والـ password فعيطة، ولا وجها لوجه.

نعاودو بالزربة

  1. key واحد كيسد وكيحل: symmetric encryption.
  2. AES بـ 256 bit فيه 2 أس 256 ديال المفاتيح: ما كيتكسرش بالتجريب.
  3. الضعف كاين فالـ password، وفكيفاش كتعطي الـ key.
  4. سد الدوسيات بـ Disk Utility ولا 7-Zip، وشعل FileVault ولا BitLocker.

ودابا، ملي تشوف شي خربشة بحال U2FsdGVkX18sRcIyy08z… عرفتي: هادي رسالة فصندوق مسدود… وكاين جوج ديال الناس عندهم الساروت.

سؤال ليك

حل الإعدادات دابا، وكتب لينا فالكومونتيرات: FileVault ولا BitLocker عندك On ولا Off؟ غير هاديك الكلمة. ما تكتب لا password، لا code.

الحلقة الجاية

بقا لينا المشكل الكبير: كيفاش تعطي الـ key لشي واحد عمرك ما تلاقيتي معاه؟ فالحلقة الجاية: صندوق البريد. أي واحد يقدر يلوح فيه رسالة، وغير نتا اللي كتحلو. هادو هوما الـ public key والـ private key.

المصادر

Digital Arabians Author

DigitalArabians

مدونة DigitalArabians متخصصة في تعليم البرمجة بالدارجة المغربية، تهدف إلى تبسيط مفاهيم البرمجة والتقنية للمتحدثين بالعربية. نقدم محتوى تعليمي عالي الجودة لمساعدة المبتدئين والمحترفين على تطوير مهاراتهم البرمجية.