تعلم البرمجة بالدارجة المغربية

شنو كيصيفط ليك الموقع بالضبط؟ HTTP وHTTPS بالدارجة

شنو كيصيفط ليك الموقع بالضبط؟ HTTP وHTTPS بالدارجة

كتحل digitalarabians.xyz، والصفحة كتبان. كتظن السيرفر صيفط ليك الصفحة، وصافي؟ لا. التليفون ديالك كتب طلب، سطر بسطر، والسيرفر جاوبو، وفالجواب رقم من 3 ديال الأرقام. والقفل اللي حدا العنوان؟ ما كيعنيش داكشي اللي كتظن.

هادا هو المقال ديال الحلقة السابعة من سلسلة “الشبكات بالدارجة” (الفيديو كامل فـ القناة ديالنا فاليوتيوب). فآخر هاد المقال غادي تعرف شنو كيعني 404، علاش http بلا s كيتحولك بوحدو، وشنو كيشوف اللي كيتصنت عليك فالويفي ديال القهوة. ربعة ديال الحوايج: الطلب، الجواب، الـ cookies، والظرف المسدود.

الأرقام فهاد المقال حقيقية: قسناها من الماك فالمغرب نهار 14 نونبر 2026، بـ curl على الموقع ديالنا: غير الـ status codes، السميات ديال الـ headers، الإصدارات والأوقات. الأرقام ديالك غادي تكون قريبة ولكن ماشي بحال بحال.

الطريق محلولة… شنو كيتقال فيها؟

فالحلقة اللي فاتت، التليفون دار الـ handshake ديال TCP (Transmission Control Protocol) مع السيرفر على الـ port 443. الطريق محلولة… ولكن شنو كيتقال فيها بالضبط؟ اللغة اللي كيهضر بيها المتصفح مع السيرفر سميتها HTTP، يعني HyperText Transfer Protocol.

1. الطلب: الـ request

تخيل الحانوت: كتقول لمول الحانوت «عطيني خبزة»، يا إما كيعطيك، يا إما «ما بقاتش». فالـ HTTP، الطلب سميتو request، والجواب سميتو response.

والـ request كيبدا بسطر واحد:

GET /blog HTTP/1.1

يعني: عطيني الصفحة ديال الـ blog، بالإصدار 1.1 ديال HTTP.

الـ method والـ URL

  • الكلمة اللولة سميتها method: شنو بغيتي دير.
  • GET: عطيني شي حاجة.
  • POST: خود هادي، بحال ملي كتعمر شي form وكتصيفطو.

والعنوان كامل اللي كتكتب فالمتصفح سميتو URL، يعني Uniform Resource Locator: فيه السمية ديال الموقع، والـ path ديال الصفحة (بحال /blog).

الـ headers

ومن تحت السطر اللول، كاينين الـ headers: سطورا صغار، فيهم معلومات زايدين:

GET /blog HTTP/1.1
Host: digitalarabians.xyz
User-Agent: Safari…
Accept: */*
  • Host: شمن موقع بغيتي، حيت سيرفر واحد يقدر يكون فيه بزاف ديال المواقع.
  • User-Agent: شكون اللي كيطلب، شمن متصفح ولا شمن برنامج.
  • ومن بعد، سطر خاوي. يعني: سالا الطلب.

الـ request: سطر الطلب، الـ headers، والسطر الخاوي

2. الجواب: الـ response

السيرفر كيرد بسطر:

HTTP/1.1 200 OK
Content-Type: text/html; charset=utf-8
  • من بعد السطر اللول، كاينين الـ headers ديالو، بحال Content-Type: شنو هاد الشي اللي جاك، صفحة، تصويرة، ولا فيديو.
  • ومن بعد الـ body: الصفحة، مكتوبة بـ HTML، يعني HyperText Markup Language. فالموقع ديالي، الصفحة الرئيسية فيها تقريبا 15 kilobytes.
  • ومن بعد، المتصفح كيطلب التصاور والستيل: request بـ request. كل تصويرة = request جديد.

الـ response: HTTP/1.1 200 OK، الـ Content-Type، والـ body

الـ status codes: الرقم اللي فالجواب

داك الرقم 200 سميتو status code: 3 ديال الأرقام، والرقم اللول كيقول ليك العائلة:

العائلة المعنى مثال
2xx مزيان 200 OK
3xx سير لبلاصة أخرى 301 Moved Permanently
4xx المشكل فالطلب 404 Not Found
5xx المشكل فالسيرفر 500 Internal Server Error

العائلات ديال الـ status codes: 2xx، 3xx، 4xx، 5xx

  • 404، Not Found: هاد الصفحة ما كايناش. جربت فالموقع ديالي صفحة ما كايناش، وجاني 404. الطلب هو اللي غالط، ماشي السيرفر.
  • 500، Internal Server Error: الطلب مزيان، ولكن السيرفر طاح فشي مشكل من الداخل.
  • 301، Moved Permanently: الصفحة تحولات لعنوان جديد، والجواب فيه header سميتو Location. والمتصفح كيمشي ليه بوحدو، بلا ما تحس.

جربت نكتب http بلا s قبل الموقع ديالي: السيرفر جاوب 301، وصيفطني لـ https.

http://digitalarabians.xyz  →  301  →  https://digitalarabians.xyz/

3. الـ cookies: كيفاش الموقع كيعقل عليك

الـ HTTP ما كيعقلش: كل request بوحدو. كيفاش الموقع كيعرف بلي راك داخل للحساب ديالك؟

السيرفر كيعطيك cookie: معلومة صغيرة فالـ header اللي سميتو Set-Cookie، والمتصفح كيرجعها معاه فكل request من بعد فالـ header Cookie. بيها كيعقل عليك: الحساب، اللغة، السلة ديال الشرا… وحتى باش يتبعوك.

المشكل الكبير: http بلا s

هادشي مزيان… ولكن المشكل الكبير: فـ http بلا s، الطلب، الـ headers، وحتى الـ cookie ديالك، كيدوزو مكتوبين بالواضح… وأي واحد فالطريق يقدر يقراهم.

4. الظرف المسدود: HTTPS وTLS

تخيل كتكتب الطلب فورقة، وكتسدها فظرف، وما يقدر يحلو غير اللي غادي ليه.

هادا هو HTTPS، يعني HyperText Transfer Protocol Secure: نفس الـ HTTP، حرف بحرف… ولكن داخل TLS، يعني Transport Layer Security.

الـ handshake ديال TLS

قبل أول request، كاين handshake صغير ديال TLS:

  1. التليفون كيقول Hello (ClientHello).
  2. السيرفر كيجاوب بـ Hello (ServerHello) وبالشهادة ديالو.
  3. كيتفاهمو على مفاتيح سريين، ومن بعد كلشي كيتشفر.

فالماك ديالي، هاد الـ handshake زاد بين 25 و45 millisecond، والصفحة كاملة وصلات فأقل من 150 millisecond.

شنو كيشوف اللي كيتصنت فالويفي ديال القهوة؟

  • داخل TLS: الـ path، الـ headers، الـ cookies، والصفحة. كلشي مشفر.
  • برا: العنوان ديال السيرفر… وغالبا حتى السمية ديال الموقع، حيت كتمشي بالواضح فأول ميساج (ClientHello).

يعني كيعرف بلي مشيتي لـ digitalarabians.xyz… ولكن ما كيعرفش شمن صفحة قريتي، ولا شنو كتبتي.

داخل الظرف: path، headers، cookies والصفحة مشفرين

HTTP/2 وTLS 1.3 و98.8%

فالموقع ديالي، الجواب جا بـ HTTP/2 فوق TLS 1.3. وفواحد الـ header (alt-svc: h3)، كيقول بلي عندو حتى HTTP/3، فوق QUIC ديال الحلقة اللي فاتت.

واليوم، حسب HTTP Archive (Web Almanac 2025)، كتر من 98.8% ديال الـ requests فالتليفون كتمشي بـ HTTPS.

الشهادة: واش هادا هو السيرفر الصحيح؟

وكيفاش التليفون كيعرف بلي هادا هو السيرفر الصحيح، ماشي واحد منتحل؟ بالشهادة، الـ certificate: فيها السمية ديال الموقع والمفتاح ديالو، ومسنية من CA، يعني Certificate Authority، جهة كيتيق فيها المتصفح. والشهادة ديال الموقع ديالي صالحة غير 90 يوم. والتفاصيل؟ عندها حلقة بوحدها فسلسلة الأمن الرقمي.

القفل ماشي ضمانة

ولكن والو من هادشي غادي يحميك… إلا كنتي فالموقع الغالط.

القفل كيعني غير جوج حوايج: الطريق مشفرة، والشهادة ديال هاد السمية. ما كيعنيش بلي الموقع نية. حتى Google كتكتب بلي تقريبا كاع المواقع ديال الـ phishing، يعني المواقع المزورين اللي كيتقلدو مواقع حقيقية، عندهم القفل. وفدراسة دارتها فـ 2021، غير 11% من اللي شاركو فهمو المعنى الدقيق ديال القفل.

الحل البسيط: شوف السمية ديال الموقع، حرف بحرف.

نعاودو بالزربة

  • request: method، path، وheaders. response: status code، headers، وbody.
  • 2 مزيان، 3 تحويل، 4 المشكل فالطلب، 5 المشكل فالسيرفر.
  • HTTPS: نفس HTTP، مشفر داخل TLS.
  • ودابا، ملي تحل digitalarabians.xyz والصفحة تبان… عرفتي: كانت request، وجواب 200 OK، داخل TLS.

سؤال ليك: شمن status code عمرك ما تنساه؟ أنا 404. كتب لينا الرقم فالكومونتيرات.

الحلقة الجاية

الويفي، الـ 4G و5G، يعني الجيل الرابع والخامس، والـ fiber. وعلاش الويفي كيتقل فبيت النعاس؟

المصادر

Digital Arabians Author

DigitalArabians

مدونة DigitalArabians متخصصة في تعليم البرمجة بالدارجة المغربية، تهدف إلى تبسيط مفاهيم البرمجة والتقنية للمتحدثين بالعربية. نقدم محتوى تعليمي عالي الجودة لمساعدة المبتدئين والمحترفين على تطوير مهاراتهم البرمجية.