ملي كتكتب digitalarabians.xyz فالتليفون، كتظن الطلب ديالك كيمشي نيشان للموقع؟ لا. كيدوز من 11 ديال المحطات، كيقلب فواحد الليستة، كيتفرق لبريات صغار، وكيغطس تحت البحر… وكلشي فـ ربع ثانية تقريبا.
هادا هو المقال ديال الحلقة الأولى من سلسلة “الشبكات بالدارجة” (الفيديو كامل فـ القناة ديالنا فاليوتيوب). غادي نتبعو هاد الطلب محطة بمحطة، من التليفون ديالك حتى للسيرفر ونرجعو. ستة ديال المحطات، وكل وحدة عندها حلقة بوحدها من بعد.
الأرقام فهاد المقال حقيقية: قسناها من كونيكسيون منزلية فالمغرب نهار 13 نونبر 2026، بأدوات بحال
digوcurlوtraceroute. الأرقام ديالك غادي تكون قريبة ولكن ماشي بحال بحال.
البداية: الإنترنت ما كيعرفش السميات
تخيل راسك فشي قهوة فكازا، الويفي شاعل، وكتكتب العنوان ديال الموقع. التليفون ديالك ما كيعرفش فين كاين هاد الموقع: كيعرف غير السمية ديالو. والإنترنت ما كيخدمش بالسميات… كيخدم بالأرقام. الرحلة كاملة هي كيفاش كتولي سمية بحال digitalarabians.xyz صفحة قدامك.
المحطة 1: الروتور (البواب ديال العمارة)
ملي دخلتي للويفي، الروتور عطا للتليفون ديالك رقم بحال 192.168.1.7. هادا سميتو private IP: كيخدم غير وسط الدار ولا وسط القهوة. العناوين اللي كيبداو بـ 192.168. محجوزة للشبكات الداخلية (RFC 1918)، ولهادا كتلقاها تقريبا فكل دار.
الروتور هنا بحال البواب ديال العمارة: كل شقة عندها نمرة من الداخل، ولكن اللي برا كيعرف غير عنوان واحد، هو العنوان ديال العمارة. ملي كيخرج الطلب ديالك، البواب كيبدل نمرة الشقة بعنوان العمارة، وكيعقل شكون اللي طلب، باش ملي يرجع الجواب يطلعو ليك نتا بالضبط. هادشي سميتو NAT (Network Address Translation).
المحطة 2: الليستة (DNS)
قبل ما يصيفط حتى حاجة، التليفون خاصو يعرف الرقم ديال الموقع. فكيسول سيرفر سميتو DNS: “شنو هو الرقم ديال digitalarabians.xyz؟”
إلا ما كانش عارف، كيمشي يسول بالترتيب:
- السيرفرات ديال الـ root كيقولو ليه: سول اللي مسؤولين على
.xyz. - هوما كيصيفطوه للسيرفر اللي عندو الجواب ديال الموقع بالضبط.
- وهو اللي كيعطيه الرقم الحقيقي، بحال
188.114.96.12.
ملي جربتها: أول مرة، هاد السؤال خدا 70 millisecond. المرة التانية؟ 3 millisecond، حيت الجواب تحفظ فالـ cache.
المحطة 3: البريات (packets)
دابا التليفون عندو الرقم، وغادي يصيفط الطلب ديالو: “عطيني الصفحة”. ولكن البيانات فالإنترنت ما كتمشيش طرف واحد: كتتفرق لبريات صغار سميتهم packets. كل بريّة فيها شكون صيفطها، فين غادية، والنمرة ديالها.
الصفحة الأولى ديال موقعنا بوحدها، شي 15 KB، كتوصل فشي عشرة ديال البريات. وإلا ضاعت شي وحدة فالطريق، كيعاودو يصيفطو غير هي، ماشي كلشي.
هاد البريات كيمشيو من محطة لمحطة بحال البريد: كل مركز (router) كيشوف العنوان وكيدفعها للمركز اللي من بعد. حسبتهم بـ traceroute: 11 محطة من الروتور ديال الدار حتى للسيرفر، ذهاب وإياب فـ 35 millisecond.
المحطة 4: الكابلات ديال البحر
بزاف كيظنو الإنترنت كيجي من الساتليت. ولكن حسب ITU، الوكالة ديال الأمم المتحدة للاتصالات، كتر من 99% ديال الترافيك الدولي كيدوز فكابلات تحت البحر: شي 500 كابل، وطولهم مجموعين كتر من 1.7 مليون كيلومتر.
والمغرب مربوط بأوروبا بكابلات بحال Atlas Offshore (من أصيلة لمارسيليا، كتر من 1,600 كيلومتر)، وMedusa اللي وصل للناظور فديسمبر 2025. يعني ملي كتهضر مع شي واحد فأوروبا، الهضرة ديالك كتغطس تحت البحر.
المحطة 5: السيرفر (ولا نسخة قريبة منو)
كتظن موقعنا كاين فبلاصة وحدة؟ لا. نسخ منو مخبية فسيرفرات فبزاف ديال المدن (هادشي سميتو CDN)، والطلب ديالك كيمشي للأقرب ليك. ملي جربت، اللي جاوبني كان سيرفر فباريز. ولهادا الرقم (IP) ديال نفس الموقع يقدر يتبدل على حساب فين كاين نتا.
المحطة 6: الهضرة مع السيرفر
قبل ما يطلب الصفحة، التليفون كيدير بحال مكالمة:
- «واش كتسمعني؟» (
SYN) - «إيه كنسمعك، وانتا؟» (
SYN-ACK) - «كنسمعك، يالاه.» (
ACK)
هادي سميتها TCP handshake. من بعد كيتفاهمو على قفل، باش حتى واحد فالطريق ما يقرا الهضرة: هادا هو HTTPS، القفل اللي كتشوف حدا العنوان. عاد كيقول ليه GET / (عطيني الصفحة)، والسيرفر كيجاوب 200 OK: ها هي.
ولكن الصفحة بوحدها ما كافياش: كتلقى فيها الستيل، التصاور، الخط… شي 20 ملف آخر، والمتصفح كيطلبهم كاملين، كيجمع البريات بالنمرة ديالهم، وكيرسم ليك الصفحة. أول جواب وصلني فـ 0.26 ثانية.
الرحلة كاملة فسطر
الروتور عطاك النمرة، الليستة (DNS) عطاتك العنوان، الطلب تفرق لبريات، داز من 11 محطة، غطس تحت البحر، لقى نسخة قريبة، تفاهم مع السيرفر، ورجع ليك بالصفحة. كل نهار، مئات ديال المرات.
علاش كيبان ليك “الإنترنت طايح” واخا الويفي خدام؟
حيت ما يمكنش تبدا الرحلة إلا ما لقاش التليفون الرقم فالليستة. ملي كيطيح الـ DNS، كيبان ليك الإنترنت طايح كامل، واخا الويفي خدام والروتور شاعل. كيفاش تكتشف هاد الحالة وتحلها، عندها حلقة بوحدها فهاد السلسلة.
الحلقات الجاية
كل محطة شفناها اليوم عندها حلقة بوحدها: العناوين (IP وMAC)، الروتور (DHCP وNAT)، الـ DNS، البريات، الـ ports ديال TCP، وHTTPS. الحلقة الجاية: العنوان ديالك فالإنترنت، كيفاش كيلقاك الموقع بين مليارات ديال التليفونات.
سؤال ليك: اشمن محطة فيهم ما كنتيش عارفها؟ كتب لينا فالكومونتيرات.
المصادر
- MDN، How the web works: developer.mozilla.org
- IETF RFC 1034 (DNS): rfc-editor.org/rfc/rfc1034
- IETF RFC 1918 (العناوين الداخلية): rfc-editor.org/rfc/rfc1918
- IETF RFC 3022 (NAT): rfc-editor.org/rfc/rfc3022
- IETF RFC 9293 (TCP): rfc-editor.org/rfc/rfc9293
- ITU، كابلات البحر (2025): itu.int
- TeleGeography، واش 99% صحيحة؟: telegeography.com
- Atlas Offshore (أصيلة ← مارسيليا): lightwaveonline.com
- Medusa فالناظور (الاتحاد الأوروبي، 2025): ec.europa.eu
