داك الصندوق ديال الإنترنت اللي فالدار، بالضو الخضر ديالو، كتظن غير router؟ لا. فيه غالبا تلاتة ديال الأجهزة فوحدة… وكيدير ربعة ديال الخدمات بلا ما تعقل. وواحدة منهم كتحميك… بلا ما تكون مصاوبة باش تحميك.
هادا هو المقال ديال الحلقة التالتة من سلسلة “الشبكات بالدارجة” (الفيديو كامل فـ القناة ديالنا فاليوتيوب). فالحلقة اللي فاتت قلنا عندك عنوان وسط الدار، وعنوان برا الدار. اليوم غادي نتعرفو على البواب اللي واقف بيناتهم: الراوتر. كيفاش كيعطي النمرة لكل تليفون فـ ثانية، كيفاش كيعقل شكون طلب شنو، وفين كاين الباب ديالو اللي خاصك تسدو.
الأمثلة فهاد المقال من الشبكة ديال الدار ديالي: الماك عندو
192.168.1.7والراوتر192.168.1.254. هادو عناوين داخلية، كاينين تقريبا فكل دار. الرقم ديال الباب40001غير مثال باش نفهمو، ماشي قياس.
تخيل جيتي عند صاحبك…
ودخلتي للويفي ديالو. فديك الثانية، وقعت هضرة بين التليفون ديالك والراوتر ديالو، بلا ما تحس. قبل ما نشوفو هاد الهضرة، خلينا نحلو الصندوق.
شنو كاين فالصندوق؟
الصندوق اللي كتعطيك الشركة اللي كتبيع الإنترنت، اللي كنسميوها ISP (Internet Service Provider)، غالبا فيه تلاتة:
- modem (من modulator-demodulator): كيهضر مع الشركة على الخيط ولا الفيبر.
- router، البواب: كيدير الطريق بين الدار والإنترنت.
- Wi-Fi access point: الأنتين اللي كتكونيكطي بيها بلا خيط.
وزيد عليهم البريزات ديال الكابل اللي من اللور: switch صغير. وحسب Cisco، الـ modem هو اللي كيربطك بالشركة، والـ router هو اللي كيربط الأجهزة ديالك فشبكة وحدة.
وعلاش مهم تعرف هادشي؟ حيت ملي كيطيح الإنترنت، المشكل يقدر يكون فواحد منهم بوحدو: الخيط ديال الشركة، ولا البواب، ولا غير الأنتين ديال الويفي.

فالحقيقة، الخدمة اللولة ديال الراوتر هي الطريق: كيدفع البريات من الدار للإنترنت ورجوع. ولكن كاينين تلاتة ديال الخدمات اللي كيديرهم بلا ما تحس، وهوما الموضوع ديالنا: النمرة، الجدول، والباب.
الخدمة الأولى: النمرة (DHCP)
ملي كتدخل للويفي، التليفون ديالك ما عندو حتى عنوان. شكون كيعطيه 192.168.1.7؟ البواب، بواحد الخدمة سميتها DHCP، يعني Dynamic Host Configuration Protocol.
التليفون ما كيعرفش شكون هو البواب، فكيغوت للكل. والهضرة بيناتهم كتكون بحال هكا، حسب RFC 2131 (RFC يعني Request for Comments: الوثائق ديال المعايير اللي كتنشر IETF، يعني Internet Engineering Task Force):
- التليفون كيغوت فالدار كاملة: «واش كاين شي واحد كيعطي النمر؟» هادي Discover.
- الراوتر: «إيه، خود
192.168.1.7.» هادي Offer. - التليفون: «مزيان، بغيتها.» هادي Request.
- والراوتر: «صافي، ديالك.» هادي ACK (Acknowledge).

ولكن النمرة ماشي ديالك للأبد: كيكريها ليك لمدة، سميتها lease، والتليفون كيجدد الكرا بوحدو. ومع النمرة، كيعطيه حتى العنوان ديال الراوتر، والـ DNS (Domain Name System، الليستة اللي غادي يسول على أرقام المواقع) (RFC 2132).
وإلا ما جاوب حتى واحد؟
كتلقى الجهاز كيعطي لراسو عنوان كيبدا بـ 169.254. (RFC 3927). فـ Windows كيسميوها APIPA، يعني Automatic Private IP Addressing. هاد الرقم علامة: البواب ما جاوبش، والإنترنت ما غاديش يخدم.
جوج ديال البوابة فدار وحدة
إلا كانو فالدار جوج ديال الأجهزة كيعطيو النمر بجوج، كيوقع الصداع: نمر متكررة، وشي أجهزة ما كتدخلش للإنترنت. Apple كتقول بالواضح: خاص يكون غير DHCP server واحد فالشبكة.
الخدمة التانية: الجدول (NAT)
هادشي مزيان… ولكن الخدمة اللي فيها السر الحقيقي، هي اللي كتخلي دار كاملة تخرج بعنوان واحد: NAT، يعني Network Address Translation.
ملي التليفون ديالك، 192.168.1.7، كيطلب صفحة:
- البواب كيكتب فواحد الجدول: هاد الطلب ديال “سبعة”، خرج من الباب رقم
40001. - كيبدل العنوان الداخلي بالعنوان ديال الدار، وكيصيفط.
- ملي كيرجع الجواب للباب
40001، البواب كيشوف الجدول: هادا ديال “سبعة”، وكيطلعو ليه نيشان.
هاد “الباب” سميتو port. ولهادا، خوك اللي كيتفرج فاليوتيوب فالبيت الأخرى، ما كيوصلوش الجواب ديالك. وملي كتسالي الهضرة، السطر ديالها كيتمسح من الجدول بعد شوية (RFC 3022).

اللي جا من برا كيبقى برا
إلا شي واحد برا بغا يبدا هو الهضرة مع التليفون ديالك، البواب ما كيلقى فالجدول حتى سطر ديالو… فكيبقى برا.
ولهادا، بعض الأجهزة، بحال الكاميرات ولا الألعاب، كتطلب منك تحل ليها باب فالراوتر: port forwarding. يعني سطر كتزيدو بيدك فالجدول، كيقول للبواب: اللي جا لهاد الباب، طلعو لهاد الجهاز. وكل باب كتحلو، خاصك تعرف علاش حليتيه.
رد البال: NAT ماشي حماية
هادي هي الخدمة اللي كتحميك بلا قصد. الـ NAT تصاوب باش يوفر العناوين، ماشي باش يحميك: الـ RFC 4864 كيقول بلي التبديل ديال العناوين بوحدو ما كيعطيش حماية. الحماية الحقيقية كيديرها الـ firewall (الجدار اللي كيقرر شنو يدوز). يعني ما تعولش على الـ NAT بوحدو.
ومع IPv6 (Internet Protocol version 6)، كل جهاز يقدر ياخد عنوان ديالو برا، فالحماية كتبقى على الـ firewall بوحدو.
الخدمة التالتة: الباب (default gateway)
هادا هو العنوان اللي التليفون كيصيفط ليه أي حاجة ماشية برا الدار: سميتو default gateway. الراوتر عندو حتى هو عنوان داخلي، غالبا 192.168.1.1 ولا 192.168.1.254. أنا عندي هو 192.168.1.254.
باش تعرف ديالك:
- فالـ iPhone:
Settings،Wi-Fi، كليكي على الـiحدا الشبكة، وشوفRouter. - فالـ Windows: كتب
ipconfig، وشوفDefault Gateway.

صفحة الإدارة: سد الباب
وإلا كتبتي هاد العنوان فالمتصفح، كتلقى صفحة الإدارة ديال الراوتر: الباسوورد ديال الويفي، الأجهزة المكونيكطية… كلشي. تقدر تشوف شكون مكونيكطي معاك، وإلا لقيتي جهاز ما كتعرفوش، بدل الباسوورد ديال الويفي.
ولهادا، حسب النصائح ديال NSA (National Security Agency) وCISA (Cybersecurity and Infrastructure Security Agency):
- بدل الباسوورد ديال صفحة الإدارة.
- حدث الـ firmware (البرنامج اللي داخل الراوتر).
- طفي الإدارة من برا الدار (remote management)، إلا ما محتاجهاش.
ولكن والو من هادشي غادي ينفعك… إلا بقا الباسوورد ديال الإدارة هو اللي جا مع الراوتر، بحال admin.
نعاودو بالزربة
- الصندوق: modem، router، وWi-Fi.
- DHCP: البواب كيكري النمر.
- NAT: الجدول اللي كيعقل شكون طلب شنو.
169.254.علامة أن البواب ما جاوبش.- والباب ديالو، بباسوورد ديالك نتا.
وداك الصندوق اللي فالقنت، بالضو الخضر ديالو؟ اللي كيعطي النمر، كيعقل شكون طلب شنو، وكيسد الباب. ماشي غير صندوق… هادا هو البواب ديال الدار.
الحلقة الجاية
الليستة: DNS. كيفاش كتولي السمية رقم، وعلاش ملي كتطيح، كيبان ليك الإنترنت كامل طايح.
سؤال ليك: شوف الـ Router فالتليفون ديالك: واش كيسالي بـ 1، ولا بـ 254، ولا بشي حاجة أخرى؟ كتب لينا فالكومونتيرات.
المصادر
- Cisco، كيفاش خدام الراوتر (modem وrouter): cisco.com
- IETF RFC 2131 (DHCP: Discover، Offer، Request، ACK، والـ lease): rfc-editor.org/rfc/rfc2131
- IETF RFC 2132 (DHCP كيعطي الراوتر والـ DNS): rfc-editor.org/rfc/rfc2132
- Apple، الإعدادات المنصوح بيها للراوترات (DHCP server واحد): support.apple.com
- IETF RFC 1918 (العناوين الداخلية): rfc-editor.org/rfc/rfc1918
- IETF RFC 3927 (العناوين
169.254.): rfc-editor.org/rfc/rfc3927 - IETF RFC 3022 (NAT، الجدول، والـ port forwarding): rfc-editor.org/rfc/rfc3022
- IETF RFC 4864 (NAT ماشي حماية، والـ firewall): rfc-editor.org/rfc/rfc4864
- Microsoft Learn،
ipconfig: learn.microsoft.com - TP-Link، العنوان ديال الراوتر فالـ iPhone: tp-link.com
- NSA، حماية الشبكة ديال الدار (2023): nsa.gov
- CISA Project Upskill، حماية الراوتر: cisa.gov